வணக்கம் மக்களே!

தமிழ் களஞ்சியத்தோட முதல் பதிவு இது. சிலருக்கு இந்த மாதிரி தலைப்புகள் பிடிக்காம இருக்கலாம். சுவாரசியமில்லனு தோணலாம். ஆனா தமிழ்தானே என்னைப் போல எழுத்தாளர்களை உங்க கிட்ட அறிமுகப்படுத்திருக்கு. அதுக்காக வாரம் ஒரு தடவை தமிழ் களஞ்சியம்ங்கிற இந்தப் பகுதி திங்கள்கிழமை இரவு வரும். விரும்புறவங்க படிக்கலாம்

நம்ம தமிழ் மொழிக்குனு ஒரு மிகப்பெரிய பாரம்பரியம் இருக்கு. அதுல ரொம்பவே சுவாரசியமான ஒரு காலகட்டம்னா அது சங்க காலம்தான். அதிலும் குறிப்பா, இப்ப நாம பேசப்போற முதற்சங்கம், ஒரு மர்மமான, அதே சமயம் தமிழ் மொழிக்கு அடிப்படைய உருவாக்குன சங்கம்னு சொல்லலாம். ஆனா, இந்தச் சங்கம் உண்மையிலேயே இருந்துச்சா, இல்லையாங்கிறது ஒரு பெரிய விவாதமாவே இருக்கு. வாங்க, அதைப் பத்தி தெரிஞ்சிக்கலாம்.

முதற்சங்கம் எங்க இருந்துச்சு?

இந்தச் சங்கம் எங்கிருந்துச்சுன்னு சொன்னா ஆச்சரியப்படுவீங்க. இந்தச் சங்கம் தென்மதுரைங்கிற ஒரு இடத்துலதான் இருந்துச்சுன்னு சொல்றாங்க. அது இன்னைக்கு நாம பாக்குற மதுரை இல்ல. இந்தக் தென்மதுரை இப்ப கடலுக்குள்ள மூழ்கிப்போச்சுனு ஒரு நம்பிக்கை இருக்கு. "லெமூரியா" அல்லது "குமரிக்கண்டம்"னு சொல்லப்படுற ஒரு பெரிய நிலப்பரப்புதான் இந்தத் தென்மதுரை இருந்த இடம்னு சில ஆராய்ச்சியாளர்கள் சொல்றாங்க. குமரிக்கண்டம் ஒரு மிகைப்படுத்தப்பட்ட கற்பனைனு சொல்லுறவங்களும் இருக்காங்க.

யார் யார் இந்தச் சங்கத்துல இருந்தாங்க?

இறையனார் அகப்பொருள் உரைங்கிற ஒரு நூல், முதல் தமிழ் சங்கத்துல இருந்தவங்களைப் பத்தி பேசுது. அது சொல்லுறபடி, முதற்சங்கத்துல 549 புலவர்கள் இருந்தாங்களாம். சாதாரண ஆட்கள் இல்லங்க, சாட்சாத் சிவன்தான் இந்தச் சங்கத்தோட தலைவரா இருந்தாராம்! அகத்தியர், முருகன், குபேரன், முரஞ்சியூர் முடிநாகராயர், குன்றூர் கிழார், மார்க்கண்டேயன், திருமால், கலைக்கோட்டுத் தும்பியூர் கிழார்னு நிறைய பேர் இந்தச் சங்கத்தோட உறுப்பினர்களா இருந்திருக்காங்க. ஒரு சங்கத்துல இவ்வளவு பெரிய ஆளுங்க இருந்திருப்பாங்களான்னு ஒரு சந்தேகம் வரலாம். ஆனா, இது தொன்மங்கள், புராணங்கள் கலந்து சொல்லப்படுற விஷயம். இதைக் கேட்கும்போது ஒரு பெரிய புராணப் படத்தை பார்க்கிற மாதிரி இருக்கும்.

எத்தனை வருஷம் இந்தச் சங்கம் இயங்குச்சு?

முதற்சங்கம் மொத்தம் 4,440 வருஷங்கள் இயங்குச்சுன்னு சொல்றாங்க. அடேயப்பா! நம்ம காலத்துல ஒரு அமைப்பு 100 வருஷம் இயங்கினாலே பெரிய விஷயம். ஆனா, இது 4,440 வருஷம்! பாண்டிய மன்னர்கள் 89 பேரு இந்தச் சங்கத்தைப் பாதுகாத்து தமிழ் வளர்த்திருக்காங்க. காய்சின வழுதிங்கிற பாண்டிய மன்னன் தொடங்கி, கடுங்கோன்ங்கிற மன்னன் வரை இந்தச் சங்கத்தை ஆதரிச்சிருக்காங்க. இதுல சில மன்னர்கள் பேரை நாம சங்க இலக்கியங்கள்லயும் பார்க்க முடியும். அதே நேரம் ஆய்வாளர்கள் இதை மறுக்குறாங்க. 4440ங்கிற கணக்கு மிகைப்படுத்தப்பட்ட கற்பனைனு சொல்லுறாங்க.

என்னவெல்லாம் நடந்திருக்கும்?

இந்தச் சங்கத்துல எண்ணிலடங்காத புத்தகங்கள், இலக்கண நூல்கள், இலக்கியங்கள் எல்லாம் இயற்றப்பட்டிருக்கும்னு நம்பப்படுது. அகத்தியம்ங்கிற ஒரு பெரிய இலக்கண நூல் இந்தச் சங்க காலத்துலதான் இயற்றப்பட்டதுன்னு சொல்வாங்க. இதுபோக, பரிபாடல், முதுநாரை, முதுகுருகு, களரியாவிர்யம்னு நிறைய நூல்கள் இந்தச் சங்கத்துல இருந்ததா சொல்றாங்க. ஆனா, துரதிர்ஷ்டவசமா, இந்த நூல்கள் எதுவுமே இப்ப நம்மகிட்ட இல்லை. கடற்கோளால  தென்மதுரையும் குமரிக்கண்டமும் அழிஞ்சப்ப இந்த இலக்கிய நூல்களும் அழிஞ்சு போச்சுனு சொல்றாங்க.

இது உண்மையா? கற்பனையா?

இப்போ ஒரு முக்கியமான கேள்வி: முதற்சங்கம்ங்கிறது உண்மையிலேயே இருந்ததா, இல்ல ஒரு கற்பனையா?

இதுதான் இப்ப வரைக்கும் அறிஞர்கள் மத்தியில பெரிய விவாதமா இருக்கு. சிலர், "இல்லவே இல்லை, இதெல்லாம் பிற்காலத்துல வந்த இறையனார் அகப்பொருள் உரைங்கிற நூல்ல சொல்லப்பட்ட கட்டுக்கதை"ன்னு சொல்றாங்க. ஆனா, சிலர் "இல்ல, தமிழ் மொழிக்கு ஒரு பெரிய வரலாறு இருக்கு. அந்த வரலாற்றோட ஒரு முக்கியப் பகுதியா இந்தச் சங்கம் இருந்திருக்கணும். கடல் கோள் எல்லாம் நிஜமா நடந்திருக்கு. அதனால, இந்தச் சங்கம் இருந்திருக்க வாய்ப்பிருக்கு"ன்னு சொல்றாங்க. சங்கம் இருந்ததா சொல்லப்படுற வருடங்கள் வேணும்னா மிகைப்படுத்தப்பட்டதா இருக்கலாம். ஆனால் முதற்சங்கம் இருந்ததுக்கான வாய்ப்புகள் அதிகம்னு சொல்லுறவங்களும் இருக்காங்க.

எதுக்கு இந்த சந்தேகம்?

• நேரடி ஆதாரங்கள் இல்ல: முதற்சங்கம் பத்தி பேசுற நேரடியான கல்வெட்டுகளோ, ஓலைச்சுவடிகளோ நமக்குக் கிடைக்கலை. இறையனார் அகப்பொருள் உரைங்கிற நூலும், கி.பி. 7 அல்லது 8-ஆம் நூற்றாண்டுலதான் எழுதப்பட்டது. அப்ப சங்க காலத்துக்கு ரொம்பப் பின்னாடி எழுதப்பட்ட ஒரு நூலை மட்டும் ஆதாரமா வச்சு இவ்வளவு பெரிய விஷயத்தை எப்படி நம்புறதுங்கிற சந்தேகம் இருக்கு.
• அதிசய தகவல்கள்: ஆயிரக்கணக்கான வருஷங்கள் இயங்கினது, சிவனே தலைவரா இருந்தது, முருகன், குபேரன்லாம் உறுப்பினரா இருந்ததுன்னு சில தகவல்கள் ரொம்பவே அதிசயமா இருக்கு. இதெல்லாம் தமிழ் மொழியோட தொன்மையையும், தெய்வீகத் தன்மையையும் வலியுறுத்தறதுக்காகச் சொல்லப்பட்டதா இருக்கலாம்னு சிலர் நினைக்கிறாங்க.

ஆனா, மறுபக்கம், கீழடி, கொடுமணல் போன்ற இடங்கள்ல நடக்குற அகழ்வாராய்ச்சிகள், தமிழ் நாகரிகம் எவ்வளவு பழமையானதுன்னு நிரூபிச்சுக்கிட்டு இருக்கு. கடலுக்குள்ள மூழ்கின நகரங்கள் பத்தியும் ஆராய்ச்சியாளர்கள் பேச ஆரம்பிச்சிருக்காங்க. இதெல்லாம் பார்க்கும்போது, முதற்சங்கம்ங்கிறது ஒரு கற்பனை இல்லை, உண்மையிலேயே இருந்திருக்க வாய்ப்பிருக்குன்னு ஒரு நம்பிக்கை வருது.

ஏன் முதற்சங்கத்தைப் பத்தி நாம பேசிட்டிருக்கோம்?

இன்னைக்கும் முதற்சங்கத்தைப் பத்தி ஏன் பேசணும்னு கேட்டா, அதுக்கு நிறைய காரணங்கள் இருக்கு.

• முதற்சங்கம்ங்கிற ஒரு கருத்து, தமிழ் மொழியோட தொன்மையையும், தமிழ் நாகரிகத்தோட பழமையையும் பறைசாற்றுது. கடலுக்குள்ள மூழ்கின ஒரு நகரத்துல ஒரு சங்கம் இருந்ததுங்கிறது, நம்ம வரலாறு எவ்வளவு ஆழமானதுனு எடுத்துக் காட்டுது.
• சங்கம்ங்கிற ஒரு அமைப்பு இருந்ததுங்கிற நம்பிக்கை, தமிழ் மொழியை வளர்க்கணும்ங்கிற ஒரு உத்வேகத்தை கொடுக்குது. அந்தக் காலத்துலேயே மொழிக்காக இவ்வளவு பெரிய அமைப்பு இருந்திருக்குன்னா, நாம இப்போ அதை எவ்வளவு பாதுகாக்கணும்னு தோணும்.
• ஒரு மர்மமான, கடலுக்குள்ள மூழ்கின சங்கத்தைப் பத்தி பேசறதே ஒரு தனி சுவாரசியம். இது பல எழுத்தாளர்களுக்கும், கலைஞர்களுக்கும் கற்பனைக்கான ஒரு உந்துசக்தியா இருந்திருக்கு.
• சங்கங்கள்ங்கிற கருத்து, தமிழ் மக்களோட பண்பாட்டுப் பெருமையையும், தமிழர்கள் மொழிக்கு எவ்வளவு முக்கியத்துவம் கொடுத்தாங்கங்கறதையும் காட்டுது.

ஆதாரங்கள் (Sources):

முதற்சங்கம் பத்தி நாம பேசுற எல்லாத் தகவல்களுக்கும் முக்கியமான ஒரு ஆதாரம் இறையனார் அகப்பொருள் உரை. இது இல்லாம, சிலப்பதிகாரம், மணிமேகலை போன்ற காப்பியங்கள்ல தென்மதுரை பத்தியும், கடல்கோள் பத்தியும் சில குறிப்புகள் வரும். கீழடி போன்ற அகழாய்வுகள் தமிழ் நாகரிகத்தின் தொன்மையை நிரூபிக்கிறதால, மறைமுகமா சங்க காலத்துக்கான ஒரு வலுவான பின்னணியைக் கொடுக்குது.

முக்கிய ஆதாரம்:

• இறையனார் அகப்பொருள் உரை (Nakkiranar's Commentary on Iraiyanar Akapporul): இந்த நூல் தான் மூன்று சங்கங்கள் பத்தி விரிவா சொல்லுது இது கி.பி. 7 அல்லது 8 ஆம் நூற்றாண்டில் எழுதப்பட்டிருக்கலாம்னு கருதுறாங்க.
• சிலப்பதிகாரம் (Silappatikaram): கண்ணகியின் கதை சொல்லும் இந்த காப்பியம், பூம்புகார் நகரத்தின் அழிவு பத்தி, கடல் கோள் பத்தி சொல்லுது. இது சங்க காலத்திற்குப் பிந்தைய காப்பியமா இருந்தாலும் சங்ககாலத்தைப் பத்தி மறைமுகக் குறிப்புகள் இருக்கலாம்ங்கிறது ஊகம்
• மணிமேகலை (Manimekalai): இந்த நூலும் பூம்புகார் கடற்கோளால அழிஞ்சதைப் பத்தி பேசுது. இந்தக் கற்பனைக்கு முதற்சங்க காலத்துல வந்த கடற்கோள் பத்தி அவங்க தெரிஞ்சிக்கிட்டது ஒரு காரணமா இருக்கலாம்னு அறிஞர்கள் சொல்லுறாங்க.
• புறநானூறு, அகநானூறு: இந்தச் சங்க இலக்கியங்கள்ல, பாண்டிய மன்னர்கள், அவங்களோட பெருமைகளைப் பத்தி நிறைய குறிப்புகள் இருக்கு. நேரடியாக சங்கங்களைப் பத்தி சொல்லலைனாலும் அந்தக் காலக்கட்டத்துல் தமிழ்மொழி வளர்ச்சிக்கு அச்சங்கங்கள் காரணமா இருக்கலாம்னு சொல்லுது.
• கீழடி, ஆதிச்சநல்லூர், கொடுமணல் அகழாய்வுகள்: இந்த அகழ்வாராய்ச்சிகள் தமிழ் நாகரிகம் ரொம்ப பழமையானதுங்கிறதையும் சங்க காலத்திற்கு முன்னரே ஒரு செழிப்பான நாகரிகம் இருந்ததையும் நிரூபிக்கிறதுதானே! இது இது எல்லாமே முதல் தமிழ் சங்கம் இருந்ததுக்கான வலுவான ஆதாரமா இருக்கு. (ஆதாரங்கள்: தமிழக தொல்லியல் துறை அறிக்கைகள், இந்திய தொல்லியல் ஆய்வுத் துறை வெளியீடுகள்)

• தமிழ் அறிஞர்களின் ஆய்வுகள்: பேராசிரியர் தெ. பொ. மீனாட்சிசுந்தரனார், டாக்டர் மா. இராசமாணிக்கனார், அறிஞர் க. அப்பாதுரையார் – இவங்களை மாதிரி பல தமிழ் அறிஞர்கள் சங்க காலம், மூன்று சங்கங்கள் குறித்து விரிவான ஆய்வுகளை செஞ்சவங்க. இவங்களோட நூல்கள் கட்டுரைகள் முதல் தமிழ் சங்கம் பத்தி நாம புரிஞ்சிக்க உதவியா இருக்கு.

மொத்தத்துல, முதற்சங்கம்ங்கிறது ஒரு மர்மப் புதையல் மாதிரிதான். அது உண்மையிலேயே இருந்துச்சா இல்லையானு இன்னும் உறுதியா சொல்ல முடியாது. ஆனா, நமக்குத் தமிழ் மொழியோட தொன்மையையும், நம்ம பண்பாட்டோட ஆழத்தையும் உணர்த்துது. ஒருவேளை, எதிர்காலத்துல இன்னும் நிறைய அகழ்வாராய்ச்சிகள் மூலமா, கடலுக்குள்ள மூழ்கின அந்தத் தென்மதுரை நகரமும், முதற்சங்கத்தோட தடயங்களும் கிடைச்சா, எவ்ளோ நல்லா இருக்கும்ல?

ஒரு பெரிய கடல்கோளால கடல் பொங்கி வந்து, அந்தப் பெரிய குமரிக்கண்டத்தையே முழுங்கிடுச்சுனு சொல்லுறாங்க. அந்த அழகான தென்மதுரை நகரமும், முதல் தமிழ்ச் சங்கமும், அங்கிருந்த எண்ணற்ற தமிழ் நூல்களும், பொக்கிஷங்களும் எல்லாமே கடலுக்கு அடியில மூழ்கிப்போனதால பாண்டிய மன்னர்கள் வடக்கே நகர்ந்து வந்து, கபாடபுரத்துல இடைச் சங்கத்தை நிறுவுனாங்க. அப்புறம் இப்போ இருக்கிற மதுரையில கடைச் சங்கத்தை நிறுவி தமிழை வளர்த்தாங்க. இதைப் பத்தி அடுத்தப் பதிவுல பாக்கலாம்.

 

Share your Reaction