பாவ் பாஜி க்ரேவி

யாரெல்லாம் அனுராகம் ஆரம்பமே படிச்சிங்க? அதுல அனுக்ரஹா ‘ரெடி டூ ஈட் ஃபுட்’ கம்பெனில வேலை பார்த்துட்டிருப்பா. அந்த வகை உணவு ஒன்னும் நமக்குப் புதுசு இல்ல. எப்பவோ மார்க்கெட்ல அறிமுகம் ஆயாச்சு. அதுல ஒன்னுதான் இந்த ‘ரெடி டூ ஈட் பாவ் பாஜி க்ரேவி’.

அலுமினியம் கவர்ல பதப்படுத்துன பாவ் பாஜி க்ரேவி இருக்கும். அந்தக் கவரோட அதை கொதிக்கிற தண்ணில 3 டூ 4 நிமிசம் வச்சு அடுப்புல வச்சுட்டா க்ரேவி சூடாகிடும். இதுக்கு அவங்க யூஸ் பண்ணுற தொழில்நுட்பத்தை retort technologyனு சொல்லுவாங்க.

வாங்கி சமைச்சு சாப்பிட்டாச்சு. செம டேஸ்ட். இதை வீட்டுல சிம்பிளா செஞ்சும் பாத்தாச்சு,.

தேவையான பொருட்கள்

1. வெண்ணெய் – 100 கிராம்
2. தக்காளி – 3
3. பெரிய வெங்காயம் – 3
4. இஞ்சி பூண்டு பேஸ்ட் – தேவையான அளவு
5. சீரகம் – 2 டீஸ்பூன்
6. கேரட் – 3
7. உருளைக்கிழங்கு – 3
8. பட்டாணி – சிறிதளவு
9. மல்லித்தூள் – 1 டேபிள் ஸ்பூன்
10. காஷ்மீரி மிளகாய் தூள் – 1 டீஸ்பூன் (கலர்)
11. மஞ்சள் தூள் – 1 டீஸ்பூன்
12. கிச்சன் கிங் மசாலா – 1 டேபிள் ஸ்பூன்
13. கொத்துமல்லி தழை – சிறிதளவு
14. எலுமிச்சை பழம் - 1

செய்முறை

• தக்காளி மற்றும் வெங்காயத்தை நீளவாக்கில் நறுக்கிக்கொள்ளவும். கேரட், உருளைக்கிழங்கை டைஸ்களாக நறுக்கவும். வேண்டுமென்றால் பீட்ரூட், காலிஃப்ளவரும் சேர்க்கலாம்.
• அடுப்பில் குக்கரை வைத்து சூடானதும் வெண்ணெய்யைப் போட்டு உருகிய பிறகு அதில் சீரகத்தைச் சேர்த்து வதக்கவும். பின்னர் நறுக்கிய வெங்காயத்தை அதில் போட்டு கண்ணாடி பதம் வரும் வரை வதக்கவும்.
• பிறகு இதில் இஞ்சி பூண்டு விழுதைப் போட்டு பச்சை வாசனை போனதும் தக்காளியைச் சேர்க்கவும். தக்காளி நன்றாக வேகும்வரை வதக்கிவிட்டு மல்லித்தூள், மஞ்சள்தூளைச் சேர்த்து வதக்கவும்.
• வதங்கிய பிற்பாடு தண்ணீர் ஊற்றி கொதிக்க விடவும். கொதிக்கும்போது அதில் உப்பு, கிச்சன் கிங் மசாலா, கேரட், உருளைகிழங்கு, பட்டாணியைப் போட்டு, இன்னும் கொஞ்சம் தண்ணீர் விட்டு நன்றாக கொதி வந்ததும் மூடி வைக்கவும்.
• ஹை ஃப்ளேமில் ஐந்து விசில்கள், சிம்மில் ஒரு விசில் வந்ததும் அடுப்பை அணைத்து ப்ரசர் போகும் வரை காத்திருக்கவும்.
• ப்ரசர் போனதும் மத்து அல்லது மாஷரை உபயோகித்து காய்கறிகளை மசித்து விடவும். கலவை நன்றாக வெந்துவிட்டதால் கெட்டியான க்ரேவியாக மாறிவிடும். இதில் வெண்ணெய், கொத்துமல்லி தழை, சிறிதளவு எலுமிச்சை சாறு சேர்த்தால் பாவ் பாஜி க்ரேவி ரெடி.

பாவ் பன் கடைகளில் கிடைக்கும். அதை பாதியாக வெட்டி வெண்ணெய் தடவி தோசைக்கல்லில் போட்டு எடுத்து பொடியாக நறுக்கிய பெரிய வெங்காயம், மற்றும் எலுமிச்சை துண்டுடன் பாவ் பாஜி க்ரேவியோடு சாப்பிடலாம்.

வேண்டும் என்றால் காலி ஃப்ளவரும் சேர்த்து வேக வைத்துக்கொள்ளலாம். எனக்கு அது பிடிக்காதுங்கிறதால சேர்க்கல. கிச்சன் கிங் மசாலாங்கிறது கடைகள்ல கிடைக்கும். அது ப்ராண்ட் நேம் இல்ல. ஒரு வகையான மசாலா.