பல்லில் படிஞ்சிருக்கிற கரை (Tooth Plaque), இனிப்பு பிடிச்சவங்களுக்கு ஒரு தொந்தரவா இருக்கலாம். ஆனா, புதைபடிவ ஆய்வாளர்களுக்கு அது ஒரு பெரிய பொக்கிஷம். ஒரு தடவ அது கெட்டியாகி புதைஞ்சு போச்சுன்னா, அது ஒரு டைம் கேப்சூல் மாதிரி உள்ள இருக்கிற டி.என்.ஏ., புரதங்களை அப்படியே பாதுகாக்கும்.

இப்ப, சீனால ஹார்பின் பக்கத்துல 1,46,000 வருஷம் பழமையான, கிட்டத்தட்ட முழுமையான ஒரு மண்டை ஓடு கிடைச்சிருக்கு. அதை ட்ராகன் மேன்னு சொன்னாங்க. அதுல இருந்து சுரண்டி எடுத்த பற்கரையை வெச்சு அந்த மர்மமான பழங்கால மனுஷனை அடையாளம் காணறாங்க. இந்த டிராகன் மேனோட ஈறுல இருந்த குப்பையில இருக்கிற மரபணு, புரதங்கள் எல்லாம், இந்த மண்டை ஓடு ஒரு டெனிசோவனோடதுனு இப்ப உறுதிப்படுத்திருக்கு. டெனிசோவன்ஸ்ங்கிறது நியாண்டர்தால்களுக்கு ரொம்ப நெருக்கமான, ஆனா இப்போ அழிஞ்சுபோன ஒரு பழங்கால மனித இனம். இந்த கண்டுபிடிப்பை 'Science' மற்றும் 'Cell'ங்கிற ரெண்டு ஆய்வுப் பத்திரிகையில வெளியிட்டிருக்காங்க.

இந்த மண்டை ஓடு கிடைச்ச இடம், அதோட வயசு, மத்த டெனிசோவன் புதைபடிவங்களோட அதோட உடல் அமைப்பு இது எல்லாத்தையும் வெச்சு நிறைய பேரு இதை டெனிசோவன்னு சந்தேகம் பட்டாலும், மூலக்கூறு அளவிலான இந்த உறுதிப்படுத்தல் மூலமா, விஞ்ஞானிகள் ஒரு முழுமையான டெனிசோவன் மண்டை ஓட்டை இறுதியா கண்டுபிடிச்சிருக்காங்க. இந்த ஆய்வுகள்ல சேராத உப்சாலா பல்கலைக்கழகத்தின் பரிணாம மானுடவியலாளர் கரீனா ஷ்லெபுஷ், "இது 'டெனிசோவன்கள் இப்படித்தான் இருந்தாங்க'னு சொல்றதுக்கு நம்ம பயன்படுத்திக்கிற முக்கியமான குறிப்பு"னு சொல்றாங்க. "இது நிஜமாவே ரொம்ப உற்சாகமானது."

இந்த புது ஆய்வுகளுக்கு முன்னாடி, ஆசியால இருக்கிற குகைகள்ல கிடைச்ச சின்ன எலும்பு துண்டுகள்ல இருந்து டி.என்.ஏ-வ பரிசோதனை பண்ணி மட்டும்தான் டெனிசோவன்ஸ அடையாளம் கண்டாங்க. அவங்களுக்கு முழுமையான எலும்புக்கூடு எதுவும் கிடைக்காததால, டெனிசோவன்ஸோட தோற்றம், அவங்களோட உயரம் எல்லாம் எப்படி இருந்திருக்கும்னு வெறும் ஊகிக்க மட்டும்தான் முடிஞ்சது. "நியாண்டர்தால்ஸ பத்தி நமக்கு நிறைய தகவல் இருக்கு. ஆனா டெனிசோவன்ஸ்னு வரும்போது நமக்கு ஒண்ணுமே தெரியாம இருந்துச்சு"னு ஷ்லெபுஷ் சொல்றாங்க.

2021-ல கிடைச்ச ஹார்பின் மண்டை ஓடு - அதோட பெரிய அளவு, தடிச்ச புருவங்கள், கனமான மேல் தாடை - இதையெல்லாம் முதன்முதலா விவரிச்சபோது, நிறைய ஆராய்ச்சியாளர்கள் இது சீக்கிரமே டெனிசோவன்னு அடையாளம் காணப்படும்னு நம்புனாங்க. ஆனா, அந்த மண்டை ஓட்டோட தடிச்ச எலும்பு, பல்லுல இருந்து டி.என்.ஏ எடுக்க எடுத்த முயற்சி எதுவும் பலனளிக்கல.

அதுக்கு பதிலா, சீன அறிவியல் அகாடமியோட முதுகெலும்பு புதைபடிவவியல் மற்றும் தொல்லுயிரியல் நிறுவனத்துல மரபியல் நிபுணரா இருக்கிற கியாவோமி ஃபு, இந்த ரெண்டு புது கட்டுரைகளோட முக்கிய எழுத்தாளர், ஒரு புது வழியைத் தேர்ந்தெடுத்தாங்க. மண்டை ஓட்டுக்குள்ள மரபணுப் பொருளைத் தேடுறதுக்கு பதிலா, அவரும் அவரோட டீமும், அந்த மண்டை ஓட்டுல ஒண்ணே ஒண்ணு மிச்சமிருந்த கடைவாய்ப் பல்லோட கருப்பான வேர்ல இருந்து கொஞ்சூண்டு புதைபடிவமா இருந்த பற்கரையை சுரண்டி எடுத்தாங்க.

பற்கரையில எலும்பு அல்லது பல்லுல கிடைக்கிறத விட பழங்கால மனித டி.என்.ஏ குறைவாத்தான் இருக்கும். ஆனாலும், அதோட பாறை மாதிரி இருக்கிற தாது அமைப்பு உள்ள இருக்கிற விஷயங்களை நல்லா பாதுகாக்கும். "இது மாதிரி சமயங்கள்ல, ரொம்ப பழமையான ஆளுங்களோட டி.என்.ஏ எடுக்கறதுக்கு பற்கரைதான் நமக்கு இருக்கிற ஒரே நம்பிக்கை"னு ஹார்வர்ட் பல்கலைக்கழகத்தின் தொல்லியல் மரபியல் நிபுணர் கிறிஸ்டினா வாரினர் சொல்றாங்க. "அவங்க அதை கரெக்ட்டா பயன்படுத்தியிருக்காங்க."

ட்ராகன் மேன்னு சொல்லப்பட்ட மண்டை ஓட்டோட  பல்லுல இருந்து வெறும் 0.3 மில்லிகிராம் பற்கரையை மட்டும்தான் அந்த டீம் எடுக்க முடிஞ்சது. அந்த மாதிரில இருந்து பிரிச்செடுத்த மனித மரபணுப் பொருள்ல கிட்டத்தட்ட நாலுல மூணு பங்கு நவீன காலத்து கலப்படம். ஆனா, பழமையான மனித டி.என்.ஏ, ஏற்கனவே வரிசைப்படுத்தப்பட்ட டெனிசோவன் மரபணுக்களோட மைட்டோகாண்ட்ரியல் டி.என்.ஏ-வோடு ஒத்துப்போச்சு. இதனால, டிராகன் மேன் ஒரு டெனிசோவன்தான்ங்கிறத ஆராய்ச்சியாளர்கள் 'Cell' பத்திரிகையில உறுதியா சொல்லியிருக்காங்க. சைபீரியால கிடைச்ச மத்த டெனிசோவன்களோட ஒப்பிடும்போது, ஹார்பின் மண்டை ஓடு ஒரு பழமையான டெனிசோவன் வம்சாவளியைச் சேர்ந்ததுன்னும் அந்த குழு கண்டுபிடிச்சது. "இறுதியா இது டெனிசோவன் டி.என்.ஏதான், இது ஆரம்பகால டெனிசோவன்களோட தொடர்புடையதுன்னு நாங்க தெளிவா காட்ட முடியும்"னு ஃபு சொல்றாங்க.

'Science'ல வெளியான இன்னொரு ஆய்வில், ஃபுவோட டீம் அதே மாதிரியில இருந்து எடுத்த பழங்கால புரதங்களையும் அலசி ஆராய்ஞ்சாங்க. அந்தப் புரதங்களும் திபெத்துல இருந்து தைவான் வரை கிடைச்ச மத்த டெனிசோவன்களோட எலும்புகள்ல இருக்கிற புரதங்களோட ஒத்துப்போச்சு. செல்லுலார் புரதங்கள், செல்லோட கருவுல இருக்கிற டி.என்.ஏ-வோட அறிவுறுத்தல்படிதான் உருவாக்கப்படும். அதனால, மைட்டோகாண்ட்ரியல் டி.என்.ஏ-வோட முடிவுகளை இது தனிப்பட்ட முறையில உறுதிப்படுத்துது. "இது ஒரு நல்ல துணை ஆதாரம்"னு டொரன்டோ பல்கலைக்கழகத்தின் தொல்லுயிரியல் மானுடவியலாளர் பென்ஸ் வயோலா சொல்றாரு. அவர் இந்த ஆய்வுகள் எதிலும் சேரல. "இந்த ரெண்டு ஆய்வுகளையும் ஒண்ணா பார்த்தா, இது ஒரு டெனிசோவன் தனிநபர்னு ரொம்பத் தெளிவா தெரியுது."

டிராகன் மேனோட மண்டை ஓடு, பற்களோட தனித்துவமான வடிவமும் அமைப்பும், ஆராய்ச்சியாளர்கள் மத்த டெனிசோவன் எலும்புகளையும் பற்களையும் அடையாளம் காண உதவும். இது சமீபத்துல தோண்டி எடுத்ததா இருக்கலாம் அல்லது மியூசியம் சேகரிப்புகள்ல இருக்கிறதா இருக்கலாம். 

அவங்களோட வம்சம் உறுதிப்படுத்தப்பட்டாலும், டிராகன் மேன் ஃபேமிலி ட்ரீல எந்த இடத்துல இருக்காருன்னு இன்னும் உறுதியாகலை. இதுக்கு ஒரு காரணம், வகைப்பாட்டியலோட சிக்கலான விதிகள். டெனிசோவன்ஸ், நியாண்டர்தால்ஸ் தனித்தனியான ஹோமினின் இனங்களா அல்லது நம்ம சொந்த இனமான ஹோமோ சேபியன்ஸ்ஸோட துணைப் பிரிவா வகைப்படுத்தனுமானு ஆராய்ச்சியாளர்கள் விவாதிக்கிறாங்க. (நியாண்டர்தால்ஸ் மாதிரியே, நவீன மனிதர்களும் டெனிசோவன்ஸும் சேர்ந்து இனப்பெருக்கம் செஞ்சு பிள்ளைகளைப் பெத்துகிட்டதா மரபணு ஆதாரங்கள் சொல்லுது). 2021-ல டிராகன் மேனை பத்தி முதன்முதலா விவரிச்சப்போ, ஹெபேய் ஜிஇஓ பல்கலைக்கழகத்தின் தொல்லியல் ஆராய்ச்சியாளர் ஜி கியாங், இந்த ரெண்டு புது கட்டுரைகளிலும் இணை ஆசிரியரா, ஒரு புது இனப் பெயரை முன்மொழிஞ்சார். அவர் அந்த மண்டை ஓட்டுக்கு ஹோமோ லாங்கி (Homo longi)னு பெயரிட்டார். இது மாண்டரின் மொழில "டிராகன்"னு அர்த்தம்.

ஆனாலும், டெனிசோவன்னு அடையாளம் காணப்படக்கூடிய மத்த எலும்புகள் கிட்டத்தட்ட ஒரு நூற்றாண்டு காலமா கிடைச்சிருக்கு. டெனிசோவன்கள் உண்மையிலேயே ஒரு தனி இனம்னு ஆராய்ச்சியாளர்கள் முடிவு செஞ்சா, வகைப்பாட்டியல் விதிகள்படி, ஆரம்பத்துல முன்மொழியப்பட்ட இனப் பெயர்தான் செல்லுபடியாகும். "எந்த மாதிரிகள் டெனிசோவன்கள்னு நமக்குத் தெரியுற வரைக்கும், எந்தப் பெயர் செல்லுபடியாகும்னு நம்மளால உறுதியா சொல்ல முடியாது"னு வயோலா சொல்றாரு.

இந்த வாரம் எனக்குக் கிடைச்ச புது தகவல் இதுதான். அடுத்த வாரம் இன்னொரு புது தகவலோட உங்களைச் சந்திக்க வர்றேன். குட் நைட் மக்களே!

 

Share your Reaction